आंदोलन

बक्ठाहा नेता के बारा बजा दिस छत्तीसगढि़या क्रांति सेना, जबर थुकव आंदोलन अउ पुतला दहन ले होइस थू-थू
12-Feb-2022

बक्ठाहा नेता के बारा बजा दिस छत्तीसगढि़या क्रांति सेना, जबर थुकव आंदोलन अउ पुतला दहन ले होइस थू-थू


अंजोर.रायपुर,11फरवरी। रायपुर म पाछु दिन पूर्व मंत्री राजेश मूणत के खुले आम गारी-गल्ला अउ छत्तीसगढि़या मनके अपमान के केऊ वीडियो सोसल मीडिया म आए रिहिस। झगरा के पै सुरू होए रिहिस दू पार्टी के बड़का नेता मनके विरोध करे ले जेन अब गारी-गल्ला अउ छत्तीसगढि़या मनके स्वाभिमान तक पहुंचगे हावय। जानबा होवय के भाजपा के पूर्व मंत्री के अतेक गारी-गल्ला के वीडियो आए के बाद भी उंकर पार्टी के नेता मन समर्थन म खड़े हावय। का ककरो अतेक हिम्मत होगे हावय के खुलेआम गारी बक देही, उहू म प्रदेश म 15 साल राज करे भाजपा के बड़का नेता।

कांग्रेस-भाजपा म कोनो ल बात-बानी नइ लागिस, अपन-अपन पार्टीगत भासन देवत हावय। फेर छत्तीसगढि़या मनके जेन अपमान होइस ओकर कोनो गोठ नी करत हावय, सिवाय छत्तीसगढि़या क्रांति सेना के। छत्तीसगढि़या क्रांति सेना कोति ले इही ओढ़र म आज बुढ़ा तरिया के पार म जबर थुकव आंदोलन करे गिस। छत्तीसगढि़या मनके सम्मान म आयोजित ये आंदोलन म प्रदेश भरके छत्तीसगढि़या सेनानी मन जुरियाए रिहिस। सभा के रूप म सुरू होइस आंदोलन जेमा प्रदेश अध्यक्ष सिरी अमित बघेल, अजय यादव, गिरधर साहू, धीरेन्द्र साहू सहित केऊ बड़का सेनानी मन अपन विचार रखत पूर्व मंत्री के करनी म ठोसराइस अउ चेतावनी दिस के अब कोनो मोर छत्तीसगढि़या भाई के अपमान करही तव ओकर विरोध करे बर छत्तीसगढि़या क्रांति सेना सबले आगू रइही। 

जबर थुकव आंदोलन सभा के बाद रैली के रूप म पूर्व मंत्री राजेश मूणत के घर जावत रिहिस त पुलिस ह सप्रे स्कूल तिर ही रैली ल रोक दीस। जबर थूकव के उही मेर ल आगाज सुरू होगे। सेनानी मन राजेश मूणत मूर्दाबाद के नारा लगावत पुतला दहन तको करिस। प्रदेश भर ले पहुंचे सेनानी मन बक्ठाहा नेता के थू-थू करिस। ये बड़का चेतावनी आए प्रदेश म बसे परदेसिया नेता मन बर जेन अब खुले आम छत्तीसगढि़या मनला अपमानित करत हाबे। चाहे कोनो भी पार्टी के नेता होवय अब छत्तीसगढि़या मनके अपमान बरदास्त नइ करे जाए।